बलिउड अभिनेता इमरान हाश्मी अभिनीत चलचित्र ‘आवारापन २’ को शीर्षक गीत सार्वजनिक भएको छ ।

गीतमा लोकप्रिय गायक अरिजित सिंहको आवाज सुनेपछि उनी प्लेब्याक गायनमा फर्किएको चर्चा सामाजिक सञ्जालमा व्यापक रूपमा फैलिएको थियो । तर अरिजित सिंहको व्यवस्थापन टोलीले यी दाबीलाई असत्य बताएका छन् । 

अरिजित सिंहका प्रबन्धकका अनुसार यो गीत गायकले प्लेब्याक गायनबाट अवकाश घोषणा गर्नुअघि नै स्वीकृत गरेको परियोजना हो । उनले अरिजित अहिले पुराना सम्झौता तथा प्रतिबद्धता पूरा गरिरहेको र प्लेब्याक गायनमा पुनरागमन गर्ने कुनै योजना नरहेको बताएका छन् ।

उनका अनुसार सार्वजनिक भएको गीत कुनै नयाँ पुनरागमन होइन, बरु पहिले नै तय गरिएको कामको हिस्सा हो । अरिजित सिंहले यसै वर्ष जनवरीमा प्लेब्याक गायनबाट अवकाश लिने घोषणा गरेका थिए । त्यतिबेला उनले अबदेखि स्वतन्त्र (इन्डिपेन्डेन्ट) संगीतमा केन्द्रित हुने र संगीतसँग जोडिइरहने, तर चलचित्रका लागि प्लेब्याक गायकका रूपमा काम नगर्ने बताएका थिए ।

‘आवारापन २’ को शीर्षक गीतमा संगीत अमाल मलिकले दिएका छन् भने शब्द रश्मि विरागले लेखेका हुन् । नितिन कक्कर निर्देशित यो चलचित्र आगामी अगस्ट १४ मा प्रदर्शन हुने तय भएको छ । चलचित्रमा इमरान हाश्मीसँगै दिशा पाटनी, शबाना आजमी र अतुल कुमारको पनि अभिनय रहेको छ ।

सन् २००७ मा प्रदर्शन भएको ‘आवारापन’का गीतहरू अत्यन्त लोकप्रिय भएका थिए र उक्त चलचित्रलाई आज पनि बलिउडका चर्चित कल्ट चलचित्रमध्ये एक मानिन्छ ।