लमजुङको मर्स्याङदी गाउँपालिका वडा नम्बर ९ मा पालिकाको स्वागत गेट निर्माण गरिएको छ । वि.स. २०८२ फागुनबाट शुरु गरिएको निर्माण कार्य २०८३ साल असारमा सम्पन्न भएको गाउँपालिकाले जनाएको छ ।

कूल १४ लाख ५ हजार रुपैयाँको लागतमा निर्माण सम्पन्न भएको उक्त स्वागत गेटको निर्माण काम रियल टाइम कन्सट्रक्सन प्रा.लि. काठमाडौंले जिम्मा लिएको थियो । कलात्मक (आर्ट) डिजाइनको जिम्मा क्रस साइन भरतपुरले लिएको प्रमुख प्रशासकीय अधिकृत विज्ञान पौडेलले जानकारी दिनुभयो ।

गाउँपालिकाका अनुसार स्वागत गेट निर्माणसँगै पालिकाको प्रवेशद्वार थप आकर्षक बनेको छ । यसले गाउँपालिकाको पहिचानलाई उजागर गर्नुका साथै गाउँपालिका आउने आन्तरिक तथा बाह्य पर्यटक र आगन्तुकलाई सकारात्मक सन्देश प्रवाह गर्ने अपेक्षा गरिएको छ ।

गाउँपालिका अध्यक्ष अर्जुन गुरुङले स्वागत गेट निर्माण सम्पन्न भएसँगै पालिकाको सौन्दर्य अभिवृद्धि हुनुका साथै स्थानीय पहिचान प्रवद्र्धनमा महत्त्वपूर्ण योगदान पुग्ने बताउनुभयो । उहाँले आउँदो दिनमा पनि गाउँपालिकाको पूर्वाधार विकास, पर्यटन प्रवद्र्धन र स्थानीय पहिचान झल्किने संरचनाको निर्माणलाई प्राथमिकतामा राखेर काम गरिने बताउनुभयो ।