शहिद गङ्गालाल राष्ट्रिय हृदय केन्द्रले सामाजिक सुरक्षा कार्यक्रमअन्तर्गत सञ्चालित ‘चिल्ड्रेन असिस्टेन्ट प्रोग्राम’ अन्तर्गत प्रदान गरिँदै आएको आर्थिक सहायता रकम परिमार्जन गरेको छ। 

हाल केन्द्रमा लागु भइरहेको प्रति व्यक्ति दुई लाख ५० हजार  रुपैयाँ सहायता रकम हृदय शल्यक्रियाका लागि अत्यन्त अपुग भएकाले शल्यक्रियाको प्रकृति र जटिलताका आधारमा रकम सीमा पुनरावलोकन गरिएको केन्द्रका निमित्त कार्यकारी निर्देशक डा. रविन्द्र भक्त तिमलाद्वारा जारी सूचनामा जनाइएको छ।

​नयाँ परिमार्जित व्यवस्थाअनुसार अब मुटुको जटिलताका आधारमा तीन श्रेणीमा सहायता रकम उपलब्ध गराइनेछ। 

जसअनुसार एएसडी, भिएसडी, पिडिए  वा क्लोज्ड हर्ट सर्जरी  र सो सरहको शल्यक्रियाका लागि अधिकतम  दुई लाख ५० हजार रुपैयाँसम्म सहायता दिइनेछ। त्यस्तै,टिओएफ, एभिएसडी, बिडिसिपिएस,सिओए जस्ता शल्यक्रियाका लागि अधिकतम चार लाख ५० हजार सम्म  आर्थिक सहायता उपलब्ध गराइनेछ। 

यस्तै जटिल शल्यक्रियाका लागि अधिकतम ६ लाख ५० हजार रुपैयाँसम्म आर्थिक सहायता उपलब्ध गराइने केन्द्रले जनाएको छ।