News Sarobar

काठमाडौं, कार्तिक १६, काठमाडौं महानगरपालिकाका मेयर बालेन शाहले केही समयअघि आफ्नो आधिकारिक फेसबुक पेजमा लेखेको विवादास्पद स्टाटस मेटाएका छन्।
उक्त स्टाटसमा उनले अमेरिका, भारत, चीन, नेपाली कांग्रेस, नेकपा एमाले, रास्वपा, राप्रपा र माओवादी पार्टीहरूलाई लक्षित गर्दै तीव्र शब्दप्रयोग गरेका थिए।
स्टाटस सार्वजनिक भएको केही मिनेटमै सामाजिक सञ्जालमा त्यसबारे व्यापक प्रतिक्रिया आएका थिए।
कतिपय प्रयोगकर्ताले मेयर शाहको अभिव्यक्तिलाई “साहसी र निर्भीक वक्तव्य” भन्दै समर्थन जनाए भने, धेरैले भने “संविधानिक पदमा रहेका जनप्रतिनिधिबाट यस्तो आक्रामक भाषा अपेक्षित होइन” भन्दै आलोचना गरेका छन्।
राजनीतिक विश्लेषकहरूले मेयर शाहको यस्तो पोस्टलाई राजनीतिक परिपक्वताको कमीका रूपमा लिएका छन्। उनीहरूका अनुसार जनताको मतले निर्वाचित प्रतिनिधिले आफ्नो वाक स्वतन्त्रतासँगै संयम र जिम्मेवारीको सन्तुलन पनि कायम गर्नुपर्छ।
हालसम्म बालेन शाहले उक्त स्टाटस मेटाएको कारणबारे कुनै आधिकारिक टिप्पणी दिएका छैनन्।
तर उनको पोस्ट मेटिएकोसँगै, धेरैले यसलाई बढ्दो विवादलाई रोक्ने कदमका रूपमा व्याख्या गरेका छन्।